یتیشدی خیمیه ادرک صداسی عبّاسین

خدا بولور نجه قورخوشدی عترت یاسین

امام فوراً ایدوب ذوالجناحی استحضار

بولوندی مطلب اولان وقته ذوالجناحه سوار

نه گوردولر که سوار اولماقا دیزی گلمور

اورگی شدّت غمدن دقیقه دینجلمور

شتابی وار، دل خونینی اضطرابیده دور

اوزین یتورماقا عبّاسه چوخ شتابیده دور

تیکوبدی زینبه گوز، اللری بِلینده قالوب

اشاره ایله دیور گل باجی حسین قوجالوب

پوزولدی زینب حسینین گورنده پوزقون حال

دیدی حسین منی ایتمه بو نوعی غرق ملال

بویور بو حالیوه علّت ندور باجون ئولسون

بو اضطراب بو وحشت ندور باجون ئولسون

چاغوردی زینبین اوندا امام دلخسته

بلالی زینبه بیر سوز بویوردی آهسته

دیدی باجی اورگیم غفلتاً سخلدی منیم

یقین یخلدی ابوالفضل، ایویم یخلدی منیم

جواب ویردی حسین آز منی کباب ایله

دایانما ایلمه تاخیر تیز شتاب ایله

بویوردی زینب علیایه سیّد اخیار

سوار اولام باجی جان ذوالجناحه عذریم وار

بو قان اولان اورگیم بیر دقیقه دینجلمور

سوار مرکب اولان نیلیوم بِلیم گَلمور

دیدی حسین باجون ئولسون ملول اولما بیله

باشی بلالی باجون ئولمیوبدی ساغدی هله

شریک محنتیوم ایمدی خدمتونده وارام

غم ایلمه اوزوم ایمدی رکابیوی دوتارام

دوتوب رکابینی القصّه چکدی دلدن آه

جهاندا هیچ کیمی قارداشسیز ایتمسون ا...

غرض اولوبدی او نحویله ذوالجناحه سوار

کمال سرعتیلن خیمه لردن اولدی کنار

وفالی قارداشا بولمم نجه یتوردی اوزین

اونی گورن کیمی جلّادیلر ایتوردی اوزین

داغتدی دشمنی قارداش باشندان اول سرور

پیاده اولدی اورک داغلی گوزده اشک بصر

اَنوبدی شمس هدی ماه باشینون اوسته

وزیرینون اوتوروب شاه باشینون اوسته

دیز اوسته قویدی یارالی باشین ملالیلن

وزیرین اوخشادی شه بو زبانحالیلن

دیدی اویان منی یالقوز قویان ابوالفضلیم

یامان گونومدی گوز آچ بیر اویان ابوالفضلیم

او قانلی گوزلریوی آچموسان نیه قارداش

بلالی قارداشیوا ایتموسن ملالیوی فاش

عیان ایله منه دردون بولوم من خسته

عقابیدن یره دوشدون اگر یوزی اوسته

دله گلوب اوزون آگاه ایله بو سرّی منی

گوروم کیم آرخاوون اوستونده دوندروبدی سنی

بدنون آرخاسی اوسته و یا ترابه دوشوب

او وقته علّتی یوخ توپراقه یوزون بلشوب

یقین اولور منه بیر آندا رم یینده سمند

یره دوشنده ایاقون اولوب رکابیده بند

یقین بو ماه جمالون که توپراقا بورونوب

نچه قدم قوری یرده او گل یوزون سورونوب

عمامه می گوتوروب گوزلرون قانین سیلّم

یامان گونومدی منیله دانشماسان ئولّم

او قانلی گوزلرون آچ ای امید آل ا...

ایاقه دور دوت الیمدن قوجالموشام وا...

اوغول ئولومی تقرّبده چوخ اوجالتدی منی

ولی سنون ئولومون حیف اولا قوجاتدی منی

هامی بولور بونی سن معدن شجاعت سن

گوز آچموسان یوزیمه اولمیا خجالت سن

یقین سوسوزلارین حالین گلنده گورموشدون

منیم رقیّه بالاما سو قولی ویرمیشدون

جنازن اوسته تک گلمیشم قانا بویانام

اوتانما گوزلرون آچ گلمیوب رقیّه بالام

اگرچه گیتماقا اخیامه خجلتون چوخدور

قالورسان ایمدی بو ماواده قال سوزوم یوخدور

ولیک من نه یوزیلن مگر خیامه گیدوم

او خوردا قیزلاری آیا نه نوعی ساکت ایدوم

نَیی بهانه ایدوم، خوردا قیزلارا نه دیوم

سوروشسالار سنی مندن سوسوزلارا نه دیوم

وفالی قارداشیم، آرخام، ایلیم، وزیریم اویان

آدامسیزام منه سس ویر وفالی شیریم اویان

نه قدری سسلدی عبّاس آچ گلن گوزیوی

منه بیان ایله گیزلین اولان اورک سوزیوی

گتوره بولمدی عبّاس باوفالی دله

مصمّم اولدی ابوالفضلینون گوزینی سیله

سیلوب هر ایکی گوزین دیگ محنتی داشدی

ولی آچاندا ابوالفضل بیر گوزین آشدی

نه باعث اوغلون ابوالفضله اولدی یا زهرا

نیه آچانمادی بس ساق گوزین او کان وفا

اشاره بسدی داخی واضح علّتین دیمرم

جسارت ایلیوب آیری مصیبتین دیمرم

حسینین آهی موثّر اولوب علمداره

زبانحالیله گلدی بو نوعی گفتاره

حسین ازل منی معذور دوت بو دعوتدن

گیدنمرم داخی من خیمه گاهه خجلتدن

و بیرده قانه باتان پرچمیمله مشکی گوتور

گیدنده خیمه لره عترت رسوله یتور

منیم یخلماقیمی مشکیم ایلسون اعلان

رقیّه نین گوزی یولّاردا قالماسون نگران

سوسوز بالالارا بیرده منیم دلیمجه بویور

طریق عشق و وفاده یوخومدی ذرّه قصور

سو اوسته قولّاریمی سالدی دویمادی لشکر

گتورماقا سویی اخیامه قویمادی لشکر

بو مشک پارپالانان وقته سینه داغلاموشام

سوسوز بالالارا مشک آغلیوب من آغلاموشام

رضایتون وار اگر سیّدی بو خدمتیمه

توجّه ایله منیم آخِرین وصیّتیمه

بو صون نفسده منی ناامید ایتمیه سن

نه قدری وار نفسیم خیمه گاهه گیتمیه سن

سپاه عشقی قباقونده سان ویرم قارداش

باخا باخا یوزیوه بلکه جان ویرم قارداش

حقیر «منزویم» شان و جاه ایستمورم

خدا گواهدور آیری گواه ایستمورم

اوزومدن عالمه اولسام غلام فخریمدور

گروه جهله اولام پادشاه ایستمورم